Ang Aral tungkol sa Buhok

Napansin nyo po ba na ang mga kababaihan sa MCGI o kilala sa tawag na ADD ( Ang Dating Daan)  ay may mahahabang buhok kasi dito po sa aming samahan ay  pinapatupad po ng buo ang aral na  nasa Biblia at ang isa po dito ay ang patungkol sa buhok.

At sa mga kalalakihan naman ay pinagbabawal na magpahaba ng buhok gaya ng nakikita natin sa mga nasa paligid natin lalo na pagtambay at pati na rin mga  artistang lalaki local o foreigner ilan sa kanila ay may mahahabang buhok.

Sa totoo lang kaawa-awa po  ang mga taong ito dahil  hindi natruan ng mga pari at pastor ng aral sa Biblia. Ang pagpapahaba ng buhok ng lalaki  ay hindi pinapahintulutan ng Biblia dahil ito ay mahalay...basa po tayo:

1Co 11:14  Hindi baga ang katalagahan din ang nagtuturo sa inyo, na kung may mahabang buhok ang lalake, ay mahalay sa kaniya?

Ang iba dahil ayaw sumunod ay nangangatwiran pa na bakit sa lumang tipan ay may mahaba ang buhok ng lalaki gaya ni Samson. Unang-una po ang utos sa Corinto ay utos sa panahon na ng Kristiyano at pangalawa ang mga nagpapahaba ng buhok sa lumang tipan ay ginagawa ng  nagpagpapanata o nazareo noong una na wala pa ang bagong tipan.

Num 6:5  Sa lahat ng araw ng kaniyang pagkatalaga ay walang pang-ahit na daraan sa ibabaw ng kaniyang ulo: hanggang sa matupad ang mga araw na kaniyang itinalaga sa Panginoon, ay magpapakabanal siya; kaniyang pababayaang humaba ang buhok ng kaniyang ulo.

Baka naman sabihin naman na wala pang gunting noong panahon kaya ang mga lalaki ay mahahaba ang buhok...mali po... meron ng gunting noon gawa pa nga sa ginto:


Exo 25:38  At ang magiging mga gunting at mga pinggan niyaon ay taganas na ginto.

Pero sa atin bilang kinikilala natin ang ating sarili na mga Kristiyano ay malinaw ang pagkasabi ni Apostol Pablo sa mga Christians sa Corinth na bawal po talaga ang long hair sa mga lalaki. Pero sa mga babaeng Kristiyana naman ang pagkakaroon ng mahabang buhok  ay isang kapurihan niya...ituloy po natin ang basa:

1Co 11:15  Datapuwa't kung ang babae ang may mahabang buhok, ay isang kapurihan niya; sapagka't ang buhok sa kaniya'y ibinigay na pangtakip.

Ito po ay distinguishing  factor ng babae at lalaki na naglilingkod sa Dios. Ayaw ng Dios ang lalaki ay mahaba ang  buhok at ang mga babae naman ay dapat mahaba ang buhok.

Ang mga babaeng tunay na sumusunod sa Dios ay walang  panahon na dapat magpaputol ng buhok dahil ito ay binigay ng Dios para sa kapurihan niya. Sa aming samahan tinuruan po kami ni Bro.Eli na sumunod sa Dios ng walang question...hindi na po kami tumatawad  pa dahil kinikilala naming pinakamataas na awtoridad ang Dios. Hindi na namin tinatanong gaya halimbawa ng:

Paano kung may split ends, hindi nyo pa rin gugupitin?...kung gusto po natin na makasunod sa utos ng Dios eh! di po nararapat na gumawa tayo ng paraan para huwag magkaroon ng split ends.

Paano kung humaba ng humaba, hindi pa rin gugupitan?  Hayaan  na lang na ang nature ang mag-pasya kung gaano ito kahaba...huwag natin isipin yung mga paraan na maging comportable tayo kundi kung paano natin mapalugod ang Dios sa pamamagitan ng pagsunod ng Kanyang utos. Kahit magmuka kaming katawa-tawa o kagalitan ng ibang tao ay ok lang po basta ang mahalaga ay OK  sa Dios kahit hindi OK sa tao.

Sa tunay na Iglesia ang mga kaanib ay hindi inugali ang makipagtunggali o mag-question sa utos ng Dios..kung bakit ganito o kung bakit ganyan. Ituloy po natin ang basa sa pagpapatunay:

1Co 11:16  Datapuwa't kung tila mapagtunggali ang sinoman, walang gayong ugali kami, ni ang iglesia man ng Dios.

Kung may takot po tayo sa Dios ay sumunod po tayo sa Kanya. Sa ibang post ay aalamin natin ang spirituwal na kahulugan kung bakit ang lalaki ay bawal magpahaba ng buhok at ang babae naman ay bawal ang maikli ang buhok ayon sa tinuro sa amin ng aming mangangaral na si Bro. Eli sa  tulong at awa ng Dios.

Salamat sa Dios!